Breaking News
Home / featured / ಮಹಿಳಾ ಕಣ್ಮಣಿ ಅಕ್ಕ ಮಹಾದೇವಿ

ಮಹಿಳಾ ಕಣ್ಮಣಿ ಅಕ್ಕ ಮಹಾದೇವಿ

ಹನ್ನೆರಡನೇಯ ಶತಮಾನದ ಕರ್ನಾಟಕದ ಶಿವಮೊಗ್ಗ ಜಿಲ್ಲೆಯ ಉಡುತಡಿ ಗ್ರಾಮದ ಸುಮತಿ, ನಿರ್ಮಲ ಶೆಟ್ಟಿಯವರ ಕುವರಿ “ಮಹಾದೇವಿ “—ತನ್ನದೇ ಆದ ವಿಶಿಷ್ಟ ವ್ಯಕ್ತಿತ್ವದಿಂದ, ಅಪಾರವಾದ ಜ್ಞಾನದಿಂದ ಇಡೀ ಮನುಕುಲಕ್ಕೆ “ಅಕ್ಕ “ಳಾಗಿ ಇತಿಹಾಸ ಮಹಿಳೆಯಾಗಿ ಹೊರಹೊಮ್ಮಿದಳು.

ಅತ್ಯಂತ ಚಿಕ್ಕ ವಯಸ್ಸಿನಲ್ಲಿಯೇ ಅಧ್ಯಾತ್ಮದ ಅರಿವು, ಜ್ಞಾನದಅನುಭವ, ವೈರಾಗ್ಯವನ್ನು ಮೈಗೂಡಿಸಿಕೊಂಡಿರುವ ಅಕ್ಕ ತನ್ನ ಬದುಕನ್ನು ತಾನೆ ವಿಶಿಷ್ಟ ರೀತಿಯಲ್ಲಿ ರೂಪಿಸಿಕೊಂಡವಳು, ಮೊಟ್ಟ ಮೊದಲ ಬಾರಿಗೆ ಮಹಿಳೆಗೆ ಅಭಿವ್ಯಕ್ತ ಸ್ವತಂತ್ರವನ್ನು ದೊರಕಿಸುವಲ್ಲಿ ಪ್ರಮುಖವಾದಳು.
ಜೀವನದುದ್ದಕ್ಕೂ ವಿಸ್ಮಯಕಾರಿ ಬದುಕನ್ನು ಸವೆಸಿದಳು,ಕಾಮ ಕ್ರೋಧ, ಮೋಹ ಮದಮತ್ಸರಗಳನ್ನು ದೂರವಿಟ್ಟು, ತನಗೆ ಒದಗಿ ಬಂದ ರಾಜಭೊಗ ತ್ಯಜಿಸಿದ ಅಕ್ಕ ಕೌಶಿಕ್ ಮಹಾರಾಜರನ್ನು ಕಡೆಗಣಿಸಿ ಕೇಶಾಂಬಿರಿಯಾಗಿ ಹೊರಟ ದಿಟ್ಟ ಹೋರಾಟಗಾರ್ತಿ, ಆತ್ಮಸ್ಥೈರ್ಯವನ್ನು ಹೊಂದಿದ ಬಂಡಾಯಗಾರ್ತಿ.

ಶರಣರ ಸಂಗವನ್ನು ಬಯಸಿ ಉಡುತಡಿಯಿಂದ ಕಲ್ಯಾಣದವರೆಗೆ ಒಬ್ಬಂಟಿಯಾಗಿ ಸವೆಸಿದ ಪಯಣ ಸಾಮಾನ್ಯವಾದುದಲ್ಲ,

ಕಲ್ಯಾಣಕ್ಕೆ ಬಂದಾಗ ಶೂನ್ಯಪೀಠದ ಒಡೆಯ ಅಲ್ಲಮಪ್ರಭುದೇವರು ಒಡ್ಡಿದ ಅಸಾಮಾನ್ಯವಾದ ಎಲ್ಲಾ ಪ್ರಶ್ನೆಗಳಿಗೆ ದಿಟ್ಟತನದಿಂದ ಉತ್ತರಿಸಿ ಅವರಿಂದಲೇ ಅಕ್ಕ ಮಹಾದೇವಿಯಪಾದಕ್ಕೆ ನಮೋ ನಮೋ ಎನಿಸಿಕೊಂಡವಳು.

ಶರಣರ ಸಂಗದಿಂದ ತನ್ನ ಅನುಭವವನ್ನು ಹೆಚ್ಚಿಸಿಕೊಂಡು,ಒಟ್ಟು 430ಕ್ಕಿಂತ ಅಧಿಕ ವಚನಗಳನ್ನೂ, ಅದ್ಭುತವಾದ ಯೋಗಾಂಗತ್ರಿವಿಧಿ, ಮಂತ್ರಗೌಪ್ಯಗಳನ್ನು ರಚಿಸಿ ಕನ್ನಡದ ಮೊಟ್ಟಮೊದಲ ವಿದ್ವತ್ಪೂರ್ಣ ವಚನಗಾರ್ತಿ,ಕವಿಯತ್ರಿಯಾಗಿ “ಜಗವೆಲ್ಲಾ ಹೆಣ್ಣು ನೋಡಾ”ಎಂದು ಹೇಳುವ ಅಕ್ಕ ಲಿಂಗ ಸಮಾನತೆಯನ್ನು ತಂದು, ಮುಖ್ಯವಾಗಿ ಮಹಿಳೆಯರಿಗೆ ಅಭಿವ್ಯಕ್ತ ಸ್ವತಂತ್ರವನ್ನು ದೊರಕಿಸುವಲ್ಲಿ ಯಶಸ್ವಿಗೊಂಡು ಇತಿಹಾಸ ಪುಟಗಳಲ್ಲಿ ಅಜರಾಮರಾದಳು.

ಶಾರೀರಿಕ,ಮಾನಸಿಕ ಶಕ್ತಿಯನ್ನು ಹೆಚ್ಚಿಸಿಕೊಂಡ ಅಕ್ಕ “ಈಜಗತ್ತಿಗಾಗಿ ನೀನು ಬದುಕಿದವಳಲ್ಲ, ಜಗದೊಡಯನಿಗಾಗಿ ಬದುಕಿದವಳು “ಎಂದು ಜಾಗೃತಮನಸ್ಸಿನಿಂದ ಜಗತ್ತು ಹಿಂದೆಂದೂ ಕಂಡರಿಯದ ಅಪೂರ್ವ ನಿರ್ಣಯವನ್ನು ತೆಗೆದುಕೊಂಡು, ಅಲೌಕಿಕ ಗಂಡನನ್ನು ಮಾಡಿಕೊಂಡು, ಸಾವಿಲ್ಲದ,ಕೇಡಿಲ್ಲದ, ರೂಹಿಲ್ಲದ, ಕುಲಸೀಮೆಯಿಲ್ಲದ, ನಿಸ್ಸೀಮ ಚೆಲುವನ ಜೋತೆಯಲ್ಲಿ ಪ್ರೇಮಾಂಕುರ ಬೆಳಿಸಿಕೊಂಡು —–
“ನಾನು ನೀನಗೊಲಿದೆ, ನೀನು ನನಗೊಲಿದೆ!
ನೀನೆನ್ನ ನಗಲದಿಪ್ಪ, ನಾನಿನ್ನನಗಲದಿಪ್ಪನಯ್ಯಾ!
ನಿನಗೆ, ನನಗೆ ಬೇರೊಂದು ಠಾವುಂಟೆ!
ನೀನು ಕರುಣೆಯೆಂಬುದು ನಾನು ಬಲ್ಲೆನು,
ನೀನರಿಸಿದ ಗತಿಯೊಳಗೆ ಇಪ್ಪಳಯ್ಯಾ, ನೀನೇ ಬಲ್ಲೇ ಚೆನ್ನಮಲ್ಲಿಕಾರ್ಜುನದೇವಾ!ಎಂದು ಹೇಳುತ್ತಾ—-

ಶ್ರೀಶೈಲದ ಕದಳಿಯ ಕಡೆಗೆ ನಿಜ ನಿಲುವಿನಾ ಬಯಲನ್ನು ಅರಸುತ್ತಾ ಗಿಡ,ಮರ,ಪ್ರಾಣಿ ನಿಸರ್ಗದ ಜೋತೆಯಾಗಿ-ಹಸಿವಾದೊಡೆ ಬಿಕ್ಷಾನ್ನಗಳುಂಟು, ತ್ರಷೆಯಾದೊಡೆ ಕೆರೆಹಳ್ಳ ಬಾವಿಗಳುಂಟು, ಶಯನಕ್ಕೆ ಹಾಳು ದೇಗಲುಗಳುಂಟು,ಆತ್ಮಸಂಗಾತಕ್ಕೆ ನೀನೆನಗುಂಟು ಚೆನ್ನಮಲ್ಲಿಕಾರ್ಜುನ–ಎಂದು ಹೇಳುತ್ತಾ ಅವನ ಹುಡಕಾಟದಲ್ಲಿ ಆವಳು ಹಾಕಿದ ಹೆಜ್ಜೆ ಹಿಂದೆಯಿಡದೇ ಎದೆಗುಂದದೇ,ತನಗೆ ಕಾಡುವ ಮಾಯೆಯನ್ನೂ ಸಹ ಎದುರಿಸಿದ ಅಕ್ಕ

“ಬಿಟ್ಟನೆಂದಡೆ ಬಿಡದೀ ಮಾಯೆ,
ಬಿಡದಿದ್ದಡೆ ಬೆಂಬತ್ತಿತ್ತು ಮಾಯೆ,
ಯೋಗಿಗೆ ಯೋಗಿಣಿಯಾಯಿತ್ತು ಮಾಯೆ ಮಾಯೆ,
ಸವಣಂಗೆ ಸವಣಿಯಾಯಿತ್ತು ಮಾಯೆ,
ನಿನ್ನ ಮಾಯೆಗೆ ನಾನಂಜುವಳಲ್ಲ,
ಚೆನ್ನಮಲ್ಲಿಕಾರ್ಜುನದೇವಾ ನಿಮ್ಮಾಣೆ”

ಮಾಯೆ ಯಾವ ಪರಿಯಲ್ಲೂ ಕಾಡಿದರೂ ನಾನು ಅಂಜುವಳಲ್ಲ ಎಂದು ಹೇಳುವ ಅಕ್ಕ ಅಧ್ಯಾತ್ಮದ ಉನ್ನತ ಶಿಖರವನ್ನು ಏರಿದವಳು, ಅಂಧಕಾರವಾಗಿ, ಅಜ್ಞಾನವಾಗಿ ಮಾಯೆಯನ್ನು ಧೈರ್ಯದಿಂದ ಎದುರಿಸಿ, ಅವಳಿಗೆ ಮಲ್ಲಿಕಾರ್ಜುನ ಮೇಲೆ ಇರುವ ಅಪಾರವಾದ ಪ್ರೀತಿ, ಎಣೆಇಲ್ಲದ ವಿಶ್ವಾಸದಿಂದ ಅವನನ್ನು ಹುಡುಕುವ ಬಯಕೆಯಿಂದ–
ಕಾಣುತ್ತಾ ಕಾಣುತ್ತಾ ಕಂಗಳ ಮುಚ್ಚಿವೆ ನೋಡವ್ವಾ,
ಕೇಳುತ್ತಾ ಕೇಳುತ್ತಾ ಮೈಮರೆದೊರಗಿದೆ ನೋಡವ್ವಾ,
ಹಾಸಿದ ಹಾಸಿಗೆಯ ಹಂಗಿಲ್ಲದೇ ಹೋಯಿತ್ತು ಕೆಳದಿ,
ನಾನೇನಂದರಿಯದೇ ಮರೆದೆ ನೋಡವ್ವಾ–

ಚೆನ್ನಮಲ್ಲಿಕಾರ್ಜುನದೇವನನ್ನು ಹುಡುಕುವ ಉತ್ಕಟತೆಯಿಂದ ದಾರಿಯೂದ್ದಕ್ಕೂ ಬರುವ ಕಲ್ಲುಮುಳ್ಳುಗಳನ್ನು ತುಳಿಯುತ್ತಾ, ಏಳು ಬೆಟ್ಟಗಳನ್ನು ದಾಟಿ—,ಕೃಷ್ಣೆಯಲ್ಲಿ ಮಿಂದು, ಕದಳಿ ಬನದಲ್ಲಿ ಮಲ್ಲಿಕಾರ್ಜುನವೆಂಬ ಬಯಲನ್ನು ಕಂಡು ಬಿಗಿದಪ್ಪಿ, ಹೃದಯ ಕಮಲದಲ್ಲಿ ಒಂದಾಗಿ ಉಸಿರನ್ನು ಕೊನೆಯದಾಗಿ ಬಯಲಲ್ಲಿ-ಬಯಲಾಗಿ ಲೀನವಾಯಿತು.

ಅಕ್ಕ ಮಹಾದೇವಿ ಜಯಂತಿಯ ಈ ದಿನದಂದು ಅವಳ ಆದರ್ಶ ಗಳನ್ನು ನಾವೆಲ್ಲರೂ ಮೈಗೂಡಿಸಿಕೊಂಡು ಧೈರ್ಯದಿಂದ ಮುಂದುವರೆದು ಜೀವನವನ್ನು ಸುಂದರಾಗಿರಿಸೋಣ ಎಂದು ಹೇಳುವ ಮೂಲಕ ಸರ್ವರಿಗೂ ಅಕ್ಕ ಮಹಾದೇವಿಯ ಜಯಂತಿಯ ಶುಭಾಶಯಗಳು.

ಶರಣು-ಶರಣಾರ್ಥಿಗಳು

ಶರಣೆ ಡಾ.ಲತಾ ಶಿವಬಸಪ್ಪ ಹೆಸರೂರು

About Shivanand

Admin : Lingayat Kranti Monthly news paper 8884000008 lingayatkranti@gmail.com

Check Also

ಡೊಂಗಿ ಮಂತ್ರವಾದಿ ಲಪಟಾಯಿಸಿದ್ದು 6 ಕೋಟಿ

  ಬೆಳಗಾವಿ: ಖ್ಯಾತ ಸಂಗೀತ ಸಂಯೋಜಕ ಕೆ.ಕಲ್ಯಾಣ ಅವರ ದಾಂಪತ್ಯ ವಿವಾದ ಹೊಸ ತಿರುವು ಪಡೆದುಕೊಂಡಿದ್ದು, ಡೊಂಗಿ ಮಂತ್ರವಾದಿ ಲಪಟಾಯಿಸಿದ …

Leave a Reply

Your email address will not be published. Required fields are marked *

error: Content is protected !!